Dötréi anni fa ò lezûo o “Licche lacche”, in libbro do profesô Bampi, e, a parte tutte e cöse da nòstra lengoa ch’ò ’nparou in mòddo façile e a-a spedia, son scciupou da-o rie co-o fæto che gh’emmo unn-a de pöche paròlle a-o mondo ch’a deuvia tutte e çinque vocale in ordine (AEIOU). A l’é zeneize e no bezeugna tradûla... Abelinou!

Ma co-o tenpo ò scoverto che ghe n’é de atre, co-e vocale in diversci ordini, e chi ve prezento quelle ch’ò amugiou. Ricòrdo che queste paròlle se ciaman panvocaliche, e devan contegnî e çinque vocale in qualonque ordine ma sensa ripetiçioin.

Comenso co-i partiçippi de trei nòstri verbi, adesciou, aleitou e catechizou, formæ in ordine AEIOU. Pöi se n’atreuvan in tante atre conbinaçioin, comme acresciuo, acugeito, desgiasou e racugeito. Senpre tra i verbi gh’é anche adeuviö, alughetiö, aruxentiö, ascuiemo, ascurtiemo, asuniemo e zazuniemo.

Dòppo avei çercou tra i sostantivi, l’é vegnuo feua ben ben de panvocaliche - feminili e plurali conpreixi. Gh’emmo abrutimento, adulterio, borsaieu, equaçion, numeratoî, polaieu, pontaieu, scorsaieu, sportigeua, superioa, tortaieu, umaneximo e urbaneximo.

Ma ghe n’é ancon in muggio fra i agetivi! Aruzenio, consecutiva, educativo, evolutiva, funeraio, iresolua, metalurgico, oustralien, outentica, speculativo, sucesòria...

E infin ò visto spontâ de atre ciù antighe ò rare, comme baleuistro (e colònne de ringhee che protezan scae e pogiöli), mateuiso (chi da i numeri ò fa i capriççi), moreuia (i bescheutti rotti che se ghe da da mangiâ a-i polastri) ò tordeuia (öxéllo da famiggia di tordi). Tra i nommi pròppi gh’é ’n paizin con tutte e vocale e ’na consonante sola: Roieua (Rivarola), fraçion de Carasco, Zena; e pe de ciù, gh’é di numeri comme çentomillaun ò millenovantun.

Fæve coraggio e provæ a demoave in zeneize anche viatri. Gh’emmo ’na lengoa beliscima, ’na grafia ofiçiâ, ’na stöia, tanti mòddi de dî e de paròlle tutte nòstre... Basta solo ese contenti de deuviale.

Alan Gazzano
Buenos Aires, Argentinn-a
www.genoves.com.ar